“Manopubbangamā dhammā mano settha manomayā
Manasā ce padutthena bhāsati vā karoti vā
Tato nam dukkhamanveti cakkam’va vahato padam”
-Monan bek dhormota anir akmulim oi. Monan-oi begotten bej dangor ar bek pap-punyo ani mono bhidiriy jagede. Huluk mone hodha hole, ham golle, sittun duk bajha de, (gari) chakka zen (damara gwru) tengor pije pije eze.
Chokkhupal bhanter kahini
Gozen Bhogoban Tothagoto Buddho zokkene Srabostir Jetobonaram hiyongot elw, sokkene Chokkhupal bhanter udije ei gatha bu ho oyi.
Srabostit Sonamajon (Mahasuvanna) nange ikko dangor majon manuj elw. Tar dhon sompotti bekkani age mattor gurogara nei. Balok bojor punyo sadhonar phole ekdin taa mokku pedot ikko guro oyi. Sibe nangan “Pal” rage dun. Arw di ek bojor bidi zenei arekku guro awlw. Dibe morot pow oyun henei tara nangani dangor bu nangan “Mohapal” aah sigon nu nangan “Cullapal” guri rage dilak. Duno bheiye dangor dingor onei arw bej bej dhon sompottir malik olak, giritti songsar shuru gurinei powsabar baap u awlak bel. Tarar maa bap duno jon buro onei mara zeyundoi bel.
Indhi Tothagoto Gozen Bhogoban Buddho, maa huledi Koliyo bongsor 80 giritti aah babw huledi Sakko bongsor 80 giritti ye, tar mane ajar ajar hudummo milinei bane diye hiyongot bana ekbar “Wuo” dhurinei elw. Undhi Awnaathpindik 54 koti horoj gurinei baneyi Jetobonaramot 19 borsa ar 27 koti horoj gurinei Visakha bane diye Purbaramot 7 borsa guri wuo dhochchi. Bek milinei Gozen Buddho 26 borsa Srabostit elw.
Awnathpindik ar Visakha, dunojone nitto ajar ajar bhikkhu sromon unore pindo daan didak. Visakha hiyongot jele sigon sromon uni nitto thaa adw hitte ringi sedak hee ani dilu na hee ani dilu. Visakha yu taa sodor powsaba san Sromon unore shroddha aah hochpedw. Tara honodin hiyongot hali ahde nw zaan. Nitto ekkan noi ekkan haddyo, paniyo benye bellye neze didak. Awnathpindige Gozen Buddhore emon shroddha gotto ze, Gozen Buddho ttun honodin hicchu pujor nw gwre. Dimmatte manjore dhormo desona gwre, awraahn oi tebw bhabinei raj putro Gozen Buddhore prosno nw gotto uttor dede bol puribu bhabinei.
Undhi yu Gozen Buddho bhabede, “Mui 4 osonko kolpo lakh bar chok, haan, sire, heye, lo, jibon dan dinei paromi puron gocchunge ezan guri manjure dhormo potthan degebattei”. Senottei Gozen Buddho yu honodin dhormo hodha nw hoyi bade Awnathpindigore ferot nw de. Nitto manjore danw hodha, silo hodha, sorgo mokkhw hodha, kaamw’ asoktir porinam hodha, songsaror awsar aah kilejo hodha, begw thumot songsar tyagor sugor anisongsor hodha guri giri habe habe manjor dhormo desona dido. Senottei Srabostit 7 koti manjor moddhe 5 koti manuj margophol labhi elak aah 2 koti putujjon elak.
Ei sei dhormo desona suninei Mohapal-e yu probojjha lobar thir gurilu. Murili dw hono dhon sompotti, bhei bon, mok pow saba emon hee nijo heye gan pele zaa puribu. Sigon bhei Cullapalore bek dhon sompotti ani gojei dinei, mok pow saba unore yu bojhenei bege hande hande theh probojjha lologoi. Dekkhe dekkhe 5 bojor song theh tar achariyo upajjhay o sidu sromon dhormo siginei din hadelw. 5 bojor jere Gozen Buddho-idhu jenei pujor gollogoi, ei Buddho sasonot hee hee sighibar ar dayitto palebar age guri nei.
Gojen Buddho tare Gronthodhur aah Vipossonadhur guri 2 an jinij sighibar age guri hoyi. Gronthodhur olode, ze hono ikko baa bek Tripitok kun sighi lona ar onno jonore yu sighana. Vipossonadhur olode nije nije monan ringi chei vipossona kormosthan lonei Awrohotto phol pebar serejta gorana. Buro hale probojjha loyi henei Gronthodhur obar somoi bidhi zeyigoi guri bhabinei theh holode Vipossonadhur onei nijore dugottun soran pebar serejta gurim hone honei Gozen Buddhottun kormosthan lone loi 60 jon bhikkhu 120 yojwn (~300 km) dur adamot dhyan sadhona gora gelak.
Sidhu ekkan adamot 3 maj song awpromotto one oi adamw huri aronnyo jharot thenei dhyan sadhona shuru gollak. Ei tin majw bhidiri Mohapal Bhante ek ret o ghum nw zai. Bana tinan asonot tedw: boi thenei bhabona, tige thenei bhabona ar sonkromon bhabona gurinei 3 maj hadelw. Chokkhupal bhanter kutibu bana boi parede song dangor, sidire guri yu thei nw pare, semba sigon. Thaa dibe chok nitto tep tep pani jhoron. Bonojo daktor dagi ani tare daru didilak, mattor ghum jei jei daru an di pwre, ar the dede boide boide henei daru an o hamot nw lag ear daktor buy u tare daru nw de ar. 3 majo madat teh ebbere chokkhun guli zei borbad zeyun ar zedinye chok haan oyi sedinye loge loge Sukko Vipossona (Niguj Bidorshon) Awrhotto margophol o labh gollo.Taa loge 60 jon bhikkhu ye yu sei dhur adamot 3 majo bhidiri awpromotto oi dhyan sadhona gocchun ar bekkune awrhot oyun. Sokkettun dhuri Mohapal bhantere Chokkhupal nange adamme uni dagidak. 3 maj pore bek 60 jon bhante uni Gojen Buddhore chaa elak sittun mattor Chokkhupal bhante theh choge nw dege henei sidu arw hoyek din thei gelw. Adamme parallel uni bhante re siyong ani didak aah seba sojja gotthak. Undi Srabostit zelakkhe bhante dayi yu Chokkhupal bhanter guro bhei Cullapal-ore thah bor bhei bhante poidene holak ar hoja zebattei upodej o dilak.
Cullapale theh tar bhagine ekjonore podo zatrat nanan bipod apodottun rokkha pebattei sromon banenei hoja zaa bajei dilo. Taah Bhagini bu sei adamot zene zei Chokkhupal bhante re hoja jelw. Mattor nei, ette ette oddegot ekkan adamw haihuri tarumot jiren lolak. Sei adamottun se sromonnur poricito ikko gabur mili darbo toga jenei lagot paa pi olakkoi. Sromonnu Chokkhupal bhante re mije hodha hoi ekkan jagat, “Hakkon thak bhante” honei pele zenei darbo toga jeyide tar poricito mile bu loi silo bipotti gurilugoi. Zokke sromonnu ferot ecchigoi, Chokkhupal bhante bekkan baw bujhinei tare sittun papi sromon hone hoi dabe dilu. Sromonnu yu monot duge jehetu mone nw hoyi guri sromon oyi taa mollye bhante re hoja zebattei, siyodoi probojjha tyag guri bhante re gaigai tarumot pele zei thaa ghawrot zelawgoi. Sittun Chokkhupal bhanter silo teje Sokroraja asonan gorom oi Sokro raja nijei manuj saji moityo logot enei Chokkhupal bhante re Srabosti song dhuri dhuri nezei bari di elawgoi. Sidu Srabostit Chokkhupal bhater guro bheiye bane diye hiyongot jiran lawlaw.
Sedinye omohodo jhor pocchi. Zenesene Chokkhupal bhante thar bhei ye bane diye hiyongot udinei thaah bhei bu tare seba sotkar gurinei tar helye teh Jetobonaram hiyongot bare di elwgoi. Gozen Bhogoban Buddhore mada nighuri jhu janebattei Jetobonaram hiyongot Chokkhupal bhante yu tare jukkole dunne kutirot porong ologoi. Chokkhupal bhante olode haan, choge nw dege. Se dinye redot ujol lamoni guri guri sonkromon gotte solat ekjaak bhije madittun nigilli ranga ranga puk thaa tengot puri mara zeyun. Tar helye benye ekdaak bhante ye tare saa enei mora pukkun dekkundi. Dighinei bhante poidene bojong monobap anyun aah Gozen Buddhoi du janelakkoi. Gozen Buddho pujor gurilu tarare, tara hee nichchoge dekkhun Chokkhupal bhante uri uri pukkhun mare peilye guri? Tara “Nade” guri uttor dilak.
Sebeden, Gozen Buddho tarare yu bhangi hawlaw, “Thik zikkin guri tumi theh ranga pukkhun mare pelade nichchoge nw degw, thik sikkin guri theh yu sei jeda pukkhun nw dege. Se bade yu, Chokkhupal bhante awlawde ikko Sukkavipassana Awrhot, theh honodin jeda poranbola mare pelebar setona naw anibu”.
Ar zokkene thubeyi bhante uni pujor gollak Chokkhupal bhante awrhot one oi yu hette haan oyi, sokke the Gozen Buddho tar agw jonomor kahini an bhangi hoi dilu.
Etteh ek jonomot, Chokkhupal Bhante ikko biret bonojaw daktor elw Baranasi rejjot. Theh adam adam bere bere rogi chigichchhe gottogoi. Ekdinnye adam berade berade ikko chok durbol mile lagot penei tare hawlwde, “Bon! Taw chokkunottun dw tep tep pani porer. Mui ikko bonojo daktor, tw chokkhun daru dinei gom gore di parim”. Theh sebeden, se milebu yu hwlw, “Oh daktor nanu! Mw chokkhun judi tui gom gore di parochchhi oi, mw pow saba sumuttu tw dasi oi seba gurimmi”. Daktojje yu thaah hodha bicchej daru puchchel didilu ar ekko pollai chokkun gom olak bel. Indi, milebu mure mure sokrantw gurilude, “Mui dw thaidu hhahm heyung, chokkhun gom awle mw powsaba sumuttu thaa sidu dasi omboi. Ikke tare mije hodha hoi, thwgaa puribude”.
Arek dine daktor bu loi dega onei mije holode, thaa chokkhun nahi agettun bej borbad jeyun ar sobai nw dege ar. Daktor bu thaa mije hodha dhuri parinei tare jonommu haan gorebattei arek pucchel daru dinei siyan chogot guli dibattei hwlw. Sene sene se milebu sittun dhuri ekkere jonommu chok haan oi gelwgoi bel.
Eh sei awkusol kormot darai Chokkhupal bhante, balok jonom chok haan oi jormeyi. Ei jonomot Awrhot awne oi yu chok haan oi pelw ar awkusol kormo bhog guri pelw. A senottei ho oyide awlwede, pap kormo gurile pije pije dugor phol an o eze sen gwru pije pije gari chakka buy u eze.
“Monan bek dhormota anir akmulim oi. Monan-oi begotten bej dangor ar bek pap-punyo ani mono bhidiriy jagede. Huluk mone hodha hole, ham golle, sittun duk bajha de, (gari) sakka zen (damara gwru) tengor pije pije eze.”
Chakma Digital Library 